重點唔係講技術分析有無用，而係講思辨的系統。
收到 Snoopy 的留言：
市面上書藉大部份都是講基本分析賺大錢的人,用技術分析賺大錢的人你會知咩?唔講唔係代表無丫！
華富財經有個力哥用１０萬炒窩輪，２００５年中開倉至現在升了１１倍，升值到１１０萬；美國每年都有全國性投資大賽，每年冠軍都是用技術分析年回報２２０％的人！有很多技術分析名人都費時出書，費時教你班愚笨的人．．哈哈！
隨笈回應：
如天梁星所講，香港每年都唔少人投資幾十蚊就搵到幾百萬甚至成千萬架。
以前睇報紙六合彩版都有好多「專家」，根據以往的攪珠結果，將幾十期ｄ號碼攪出既Pattern，做哂圖表，歸哂類，邊ｄ出得多，邊ｄ出得少，邊ｄ出先，邊ｄ號碼會跟住邊個出等等；跟住分析一輪後教你買咩冧把。
呢ｄ真係有架喎，做埋棒形圖出來的我都見過。
黃大仙阿牛哥都係用呢ｄ咁既方法贏咗頭奬成千萬喎，由投注到領取奬金只係幾日時間。佢$20買一張六合彩，賺了一千萬，短短兩日翻了差不多五十萬倍。
用技術分析買六合彩賺大錢的人你會知咩？唔講唔代表無。有唔少技術分析贏了六合彩頭奬或者中咗3T的人都費事出書（例如：阿牛哥唔會出書寫《向賽馬會借第一個一千萬》〔英文版《Borrow my first HKD$10mil from HK Jockey Club》），教你班愚笨的人。
呢ｄ咁既思辨系統，套咗其他嘢落去，就會覺得好搞笑。
如果可以靠技術分析買輪兩年翻十一倍，咁仲唔成副身家訓入？
唔好話有ｄ咩秘技，什麼不為人知的獨門絕技。咁等於無講過嘢。
其實呢套系統，大家都可以嘗試將祈福黨呃人的伎倆放入去，會講得一樣的順。
